38歲吳日言(Yan)與圈外愛人Barry結婚4年,育有3歲女兒Bea。一直都計劃想生多個小朋友的Yan原來已成功懷孕,現懷有5個多月身孕,恭喜晒!
同場加映:Jeremy認個性沉實不及其他成員風趣 做貼地偶像喜見媽媽興奮炫耀
Yan向《晴報》分享喜訊:「係感受到自己身體變化,而知道有第二胎。因為其實我都努力咗兩年幾嘅時間,每一個月都會定期check住。直至大半年前,喺中央廚房做嘢,成日都要行嚟行去,有一日發現自己好攰,直程想坐,之後就去驗啦,知道有咗嗰刻真係好感動同好開心!」
現年38歲的Yan屬於高齡產婦,她今胎和第一胎都患有妊娠糖尿病,令Yan十分擔憂,「我今朝去咗覆診,啱啱知道又有妊娠糖尿病,醫生叫我入院觀察,但依家疫情下入院好高危,所以我仲心大心細。」Yan亦表示今胎不會請陪月,「我哋擔心有外來人會受到感染,所以坐月就要靠自己,或者屋企人幫忙,同埋食番自己嘅陪月餐。」
為了迎接BB來臨,Yan一家人已細屋搬大屋,預產期7月的她,笑言仍未告知老公自己腹中BB性別,她說:「我老公之前懶得戚話知道BB係男定女,但我又想宣布嘅時候錄低佢個驚喜樣,所以仲未話畀佢知。本來都想開個派對公布,但限聚令下搞唔到,我老公就催我快啲話佢知,因為佢要改名。」
疫情期間,香港市民生活得不容易,對於懷孕中的Yan而言更甚,她笑言自己都有啲神經緊張。「Omicron傳得比較犀利,唔知係咪呢段時候有咗BB比較神經緊張,所以都特別擔心。會叫屋企人要徹底消毒,保持乾淨。同埋成日都懷疑自己係咪喉嚨痛唔舒服。」又指除咗產檢之外足不出戶,「尤其是係當疫情個數字每日都過1,000嘅時候,自己除咗產檢之外其實冇出街。加上而家冇打針嘅人唔可以去超市、商場、餐廳,所以我都冇再出去嘞!唯有同囡囡喺屋企,我都擔心小朋友會感染,佢哋始終抵抗力低啲。」
由於一直都計劃再生小朋友,Yan沒有打疫苗。她直言想生了第二胎再決定打唔打針,「因為都驚到時有咩閃失;直至知道自己真係懷孕時,都冇去打疫苗,擔心肚裏面嘅小生命會唔會捱得過呢?呢種藥物真係好新,自己都唔夠膽博,想等生咗小朋友先再算。」
Yan再次榮升人母當然相當興奮,至於她的女兒Bea得知自己即將做家姐亦非常開心。「Bea當初知道自己做家姐係一頭霧水,直至佢見到我個肚一日比一日大,佢真係意識到裏面有BB嘅。Bea每日都會錫我個肚,同BB傾偈、打招呼,有家姐風範!佢見到有啲玩具都話要keep比BB下次一齊玩,估唔到3歲已經意識到屋企會多個小成員。」
問到Yan是否計劃生埋呢個就「封肚」?定或者會想生多幾個?她就表示:「如果我真係移民,去到外地冇乜嘢做,唔排除會再生。喺香港養一個大家庭好貴,每個月嘅讀書、花費都好貴!外地嘅教育會好啲,同埋始終唔會填鴨式。」
她又指自己有想過移民,不過有很多制肘,「好多嘢都未擺得低,自己又有小朋友,香港又有生意,都唔可以咁撇脫話走就走。如果剩係得兩公婆,可能一早飛去第二度,呢兩年喺香港真係好辛苦,情緒又會唔好,同屋企人多咗磨擦啦!所以如果有得走,我都想,可以唞吓。」
【纏擾廿幾年】吳日言曾因劇烈經痛暈倒街頭 檢查揭子宮出問題:唔好恃後生【下一頁】
撰文:林惠珊